Axentes da Policía Nacional e a Garda Civil integrados na plataforma Jusapol (Xustiza Salarial Policial) volverán saír á rúa a próxima fin de semana tras meses sen mobilizacións públicas. Farano o sábado 4 de agosto en distintas localidades turísticas, entre elas, Sanxenxo.
A cita será ás 20.00 horas en Portonovo. Segundo deron a coñecer este luns desde a organización, sairán desta zona de Sanxenxo e dirixiranse, pola estrada PO-308, ata a rotonda situada á entrada da vila turística e que dá acceso á zona da praia de Silgar.
Miriam Pérez Núñez, secretaria provincial do sindicato Jupol -nado por mor de Jusapol-, indicou que a manifestación está convocada para reclamar as mesmas demandas que sostiveron desde a plataforma desde o seu nacemento, a equiparación salarial dos axentes da Policía Nacional e a Garda Civil cos efectivos doutros corpos policiais autonómicos como os Mossos d'Esquadra.
A protesta está convocada por Jusapol, non por ningún dos dous sindicatos nados tras a eclosión desa plataforma para poder sentar ás mesas de negociación co Goberno -Jupol na Policía Nacional e Jucil na Garda Civil-. Así, á manifestación están chamadas a participar tanto policías como gardas civís.