Pontevedra será unha das cidades que participarán nun proxecto piloto, auspiciado polo Ministerio de Transportes, Movilidad e Axenda Urbana, para poñer en marcha a súa propia axenda urbana, un documento estratéxico co que poder optar a novos fondos europeos.
Este documento, que Pontevedra espera ter redactado antes de final de ano, será "determinante", segundo explicou a portavoz do goberno municipal, Anabel Gulías, para participar nas convocatorias dos fondos Next Generation e o programa FEDER 2021-2027.
Con esta axenda urbana preténdese que o proceso de concorrencia aos fondos europeos non sexa unha "mera captación de recursos para obras illadas", sinalou Gulías, senón que formen parte dunha estratexia "que marque o camiño" da Pontevedra do futuro.
Será, reiterou a portavoz do executivo municipal, unha estratexia "planificada e definida" e que estará encamiñada a que Pontevedra "avance cara a excelencia urbana", mediante políticas transformadoras e sostibles ambientalmente.
Para ese proxecto piloto, no que tamén participarán cidades como A Coruña ou Murcia, o Concello asinará un convenio coa Subdirección Xeral de Políticas Urbanas do Ministerio de Transportes, con cuxa titular, Ángela de la Cruz, xa houbo reunións previas.
Dentro desta política de desenvolvemento urbano, Pontevedra prevé "concretar ben" o destino dos novos fondos europeos, segundo Anabel Gulías, para o que xa están a traballar os funcionarios municipais e a asistencia técnica contratada para ese efecto.
A maiores, os técnicos do Concello xa avanzaron nos proxectos que se presentarán a convocatorias "inminentes", como as axudas Next Generation a proxectos de mobilidade -que se convocan en apenas dous días-, residuos ou rehabilitacións en materia enerxética.
Todo iso está enmarcado no obxectivo de "dar un paso máis cara a Pontevedra que vén", defendeu a edil do BNG, que pretenden que sexa unha cidade " máis sostible" e con políticas "alternativas" que contribúan a combater o cambio climático.