"O ben feito, leva tempo". Con esa expresión quixo quitar ferro o alcalde de Pontevedra, Miguel Anxo Fernández Lores, ao atraso na presentación do orzamento municipal de Pontevedra para 2020. As primeiras contas do goberno coaligado BNG-PSOE foron cualificadas como "excelentes" por ambas as partes.
Pontevedra dispoñerá inicialmente de 79,3 millóns de euros para este ano, un 3,5% máis que en 2019, que se traduce nun aumento de case tres millóns.
"Son os maiores da historia da cidade", sinalou Fernández Lores que, acompañado polo tenente de alcalde, o socialista Tino Fernández, destacou o carácter "altamente investidor" destas contas e o seu "fondo contido" social e ambiental.
Con este orzamento, o goberno municipal quere conseguir, segundo ambos os líderes, estender a todo o municipio os estándares de calidade urbana, con "especial fincapé" en manter "todo o que xa está feito" para avanzar cara á "excelencia" dos espazos públicos, os equipamentos e os servizos públicos.
O alcalde destacou que as contas municipais de 2020 reflicten "perfectamente" a situación actual dunha Pontevedra "que crece" en poboación e en actividade económica, ao que Tino Fernández engadiu que non son os orzamentos de dúas forzas políticas "senón dun único goberno que quere seguir transformado Pontevedra".
"Somos un modelo de cidade e queremos seguir séndoo", afirmou o portavoz socialista, que engadiu que "non só non visual" senón tamén aplicando medidas "progresistas" que estean "pegadas á actualidade" e que manteñan a Pontevedra como un "referente".
O orzamento de 2020, que ascenderá concretamente a 79.336.000 euros, prevé destinar 24,7 millóns a persoal e 35,4 millóns a gasto corrente, partidas que como é habitual consomen gran parte das contas municipais. Case cinco millóns irán para transferencias de capital, segundo reflicte o proxecto presentado este venres.
Pola súa banda, no capítulo de ingresos o Concello espera recibir 29,8 millóns en impostos directos, 2,9 millóns en impostos indirectos como o IVE e outros 20 millóns en taxas municipais. Outros 20,4 millóns chegarán mediante transferencias doutras administracións e solicitarase un crédito doutros 750.000 euros.
CASE TRECE MILLÓNS PARA INVESTIMENTOS
Pontevedra reservará ademais case trece millóns para investimentos, dos cales 10,4 millóns serán investimentos directos e os 2,6 millóns restantes serán transferidos á Xunta como parte dos convenios para executar as obras do Gran Montecelo e da estación intermodal.
En canto aos proxectos que executará directamente o goberno municipal, Miguel Anxo Fernández Lores e Tino Fernández afirmaron que se trata de investimentos que "responden ás necesidades dos veciños e veciñas" e que lles fan estar "profundamente orgullosos".
Entre eles, destacan as partidas para accesibilidade rural (1,6 millóns), accesibilidade urbana (1,2 millóns), administración electrónica (1 millón), parques forestais (937.000 euros), parques e xardíns (720.000 euros), casas de cultura (602.000 euros), iluminación pública (525.000 euros), parques infantís (330.000 euros) ou instalacións deportivas (200.000 euros).
Ademais, o orzamento para 2020 inclúe a reforma do Pazo da Cultura, á que se destinarán 400.000 euros, e senllas partidas de 200.000 euros para impulsar os proxectos do novo complexo deportivo da Parda e a reforma urbana do barrio de Mollavao que, en ambos os casos, serán obxecto de convenio con outras administracións.
Engade Pontevedra Viva como fonte preferida de Google de balde
Mantente informado coas últimas noticias de actualidade.