O uso obrigatorio da máscara é un comportamento xa interiorizado polos pontevedreses e os cidadáns que incumpren a normativa son unha excepción na cidade do Lérez. Así se desprende das cifras de actuacións realizadas pola Policía Local para o cumprimento da regulación estatal. Desde que non levar máscara é un conduta sancionable, tan só foron denunciadas 37 persoas.
O Boletín Oficial do Estado estableceu o uso obrigatorio de máscaras en xuño e que as persoas que o incumprisen podían ser sancionadas con 100 euros e a Xunta regulou despois o seu uso obrigatorio en praias, piscinas e establecementos de hostalería, aínda que se poida manter as distancia de seguridade de 1,5 metros. Desde a chegada desa 'nova normalidade', fontes policiais confirman que a imaxe habitual nas rúas de Pontevedra é a de cidadáns coa obrigada protección.
Non só os cidadáns particulares caracterízanse por cumprir as normas, senón que chaman a atención a escasa cantidade de denuncias presentadas por incumprir outra norma asociada á loita contra a expansión da pandemia da Covid-19.
Neste caso, desde xullo a Xunta de Galicia prohibiu o botellón na vía pública en toda a comunidade. En Pontevedra xa só estaba autorizado por unha ordenanza municipal no parque Rosalía de Castro. Desde que se sumou esta nova prohibición, a Policía Local tan só detectou e sancionou os participantes en tres botellóns.
A Policía Local tamén constata o cumprimento das normas entre os locais de lecer. Neste caso, ás restricións derivadas do decreto estatal que regula a nova normalidade hai que sumar unha orde autonómica que ordena o peche dos locais de discotecas e demais establecementos de lecer nocturno e que a hora máxima de peche dos establecementos de hostalería e restauración é a unha da madrugada.
Segundo datos facilitados pola Policía Local, desde que entraron en vigor estas normas, tan só denunciaron a 17 locais de lecer.
Resulta rechamante que dous dos locais denunciados pola Policía Local son os mesmos que denunciou a semana pasada a Policía Autonómica nas inmediacións da basílica da Peregrina. En xullo foron obxecto dunha inspección dos policías municipais.