Pontevedra, unha vila libre, diversa e feliz coa conmemoración do Orgullo PTV+

O Día do Orgullo LGBTIQA+ tamén se conmemorou en Pontevedra por todo o alto.

Foi no parque das Palmeiras, que foi o escenario principal da Festa do Orgullo PTV+, o colofón a toda unha una semana chea de actividades sobre a diversidade sexual e afectiva.

A xornada, chea de diversión e reivindicación, comezou coa actuación do coro dirixido por Bonnie Cooper Happy Singers.

A sesión vermú, xa co parque cheo de xente, correu a cargo do grupo liderado polo activista trans Éric Dopazo Piratas sen parche, que deu paso ao xantar popular no mesmo parque.

Xa pola tarde Duendeneta Dilleis foron os encargados de amenizar a festa, na que tamén houbo moitas actividades para a rapazada.

Entre elas destacou Contos do arco da vella, unha actividade familiar con Cris de Caldas.

O fin de festa foi cousa do concerto do grupo Leria e dunha sesión con Yaya DJ.

A Festa do Orgullo PTV+ celebrouse un día despois da homenaxe que o colectivo Avante LGBT+ rendeu no Teatro Principal ao xestor cultural Marcos López, activista pola diversidade, que faleceu inesperadamente o pasado mes de agosto.

O acto, que encheu o patio de butacas do teatro, contou coa partipación de moitos dos seus amigos e amigas e coa estrea do coro queer SenD-Coro, unha idea orixinal do propio Marcos López dirixida por Marcelo Dobode, e unha performance artística de Manuel Albariñas.