A Autoridade Portuaria de Marín e Ría de Pontevedra sacou a licitación da asistencia técnica para redactar o proxecto de instalación eléctrica a buques no peirao Adolfo Reboredo, situado na terminal de colectores do Porto de Marín.
A actuación contempla a implantación de sistemas OPS (Onshore Power Supply) e a construción dunha subestación eléctrica que permitirá fornecer enerxía aos barcos mentres permanezan atracados.
A obra estará cofinanciada polo programa de fondos europeos FEDER4, dentro das liñas de apoio a infraestruturas estratéxicas e sostibles.
O sistema OPS permite que os buques se conecten á rede eléctrica terrestre cando están en porto, evitando así o uso dos seus motores diésel auxiliares, que actualmente se manteñen en funcionamento para cubrir as necesidades enerxéticas a bordo.
Este cambio tecnolóxico ten un impacto directo na redución de emisións contaminantes e de gases de efecto invernadoiro, ademais de diminuír o ruído e mellorar a calidade do aire na contorna portuaria e urbana.
Na práctica, supón que un portacontedores atracado poderá "apagar motores" e funcionar con enerxía procedente de terra, un avance fundamental na descarbonización do transporte marítimo.
A futura subestación eléctrica será o corazón do sistema, xa que adaptará e garantirá a subministración enerxética necesario para atender a demanda dos buques.
A redacción do proxecto técnico agora licitada definirá os detalles construtivos, a potencia requirida e a integración coas infraestruturas existentes na terminal.
Con esta iniciativa, o Porto de Marín alíñase coas directrices europeas que impulsan portos máis verdes e intelixentes, reforzando a súa competitividade e o seu compromiso ambiental.