Todo listo en Poio para o inicio do curso escolar. Durante o verán, os centros escolares do municipio experimentaron unha posta a punto con obras de carpintería, pintura, albanelería, fontanería, electricidade e outros traballos de mantemento e xardinería e revisión das caldeiras.
Así o deu a coñecer este xoves o alcalde, Ángel Moldes, que visitou os distintos centros escolares de infantil e primaria do municipio acompañada pola concelleira de Cultura e Educación, Natalia Sabarís.
Moldes e Sabarís percorreron os centros para comprobar as melloras realizadas durante os meses de verán, que tiñan como obxectivo "que a volta ao colexio se realice nas mellores condicións".
O Concello tratou de dar resposta ás peticións e prioridades que trasladou cada centro escolar e destaca que esta colaboración "non é puntual para os meses de verán", senón que se vén realizando tamén durante todo o curso.
No colexio Isidora Riestra, as actuacións incluíron limpeza e pintado do exterior do edificio. O Concello tamén pintou varias aulas que quedaron pendentes o curso pasado e mellorou o peche exterior, que limita entre o centro e o parque da Reiboa.
En Chancelas, substituíronse as portas de todas as aulas, que estaban danadas polo parasito do caruncho, unha petición que o centro levaba anos realizando.
No CEIP de Viñas e no colexio infantil do Bao melloráronse os parques.
No CEIP de Lourido, pintáronse as aulas e arranxáronse os tres aseos das aulas de infantil, que están na planta baixa do centro coa colaboración da Xunta de Galicia. Ademais, cambiáronse as portas e substituíuse a tubaxe de fundición, moi deteriorada polo tempo, por unha nova acometida de abastecemento de auga. Creouse tamén un acceso directo ao baño desde a aula de 3 anos.
No CEIP Espedregada, en Raxó, xa actuaron durante o curso para eliminar as filtracións de auga no ximnasio.
Na escola Infantil A Galiña Azul, tamén a finais deste curso ampliouse a zona verde, o que lle permite dispoñer xa do seu propio horto ecolóxico. Tamén mellorou a seguridade do centro coa instalación dun sistema de alarma.