A veciñanza de Mollavao dá un paso adiante na súa organización colectiva coa constitución oficial da súa asociación veciñal.
Esta nova entidade nace para dar continuidade e cobertura legal ao movemento que se iniciou de xeito informal no ano 2017, co propósito firme de converterse nun interlocutor directo e estable ante o Concello de Pontevedra e o resto de administracións públicas.
A creación desta estrutura formal chega nun momento que os promotores consideran clave para o futuro do barrio, marcado por proxectos estratéxicos que acumulan case unha década de atrasos.
Entre as principais reivindicacións do colectivo destacan a reforma integral da rúa Rosalía de Castro ata a ponte do ferrocarril e a execución do novo vial, así como a urxencia de actuar sobre os antigos chalés militares que se atopan en estado de abandono.
Máis alá das reclamacións urbanísticas, a asociación establece como obxectivos fundacionais a defensa dos intereses comúns, o impulso do asociacionismo e a mellora da calidade de vida de todos os residentes
A intención dos impulsores é que o barrio conte cunha ferramenta eficaz para informar á veciñanza sobre calquera actuación que lles afecte e para fortalecer o tecido social da zona.
A posta de longo da entidade terá lugar o vindeiro xoves, 12 de marzo, ás 20:00 horas.
O encontro, aberto a toda a cidadanía, celebrarase no salón de actos do Edificio da Xunta de Galicia en Campolongo.
Durante esta sesión informativa, explicaranse polo miúdo as prioridades de traballo, resolveranse dúbidas sobre o funcionamento da asociación e facilitaranse os pasos para que as persoas interesadas poidan inscribirse como socios e participar activamente no desenvolvemento futuro de Mollavao.