O portavoz municipal do Partido Popular de Pontevedra, Rafa Domínguez, xunto aos concelleiros Beatriz Rey e Martín Martínez, anunciou este xoves a presentación dunha moción no próximo Pleno para solicitar a paralización das obras da autovía A-57 e aproveitar a infraestrutura xa construída para conectala cos polígonos industriais do Campiño (Pontevedra) e A Reigosa (Ponte Caldelas).
Domínguez argumentou que o proxecto da A-57, proxectado no século pasado como circunvalación da cidade, "perdeu a súa utilidade" e non se xustifica que se desenvolvan as seguintes fases da obra.
O primeiro tramo entre Vilaboa e Marcón rexistra, segundo o PP, "moi pouca circulación", e as dúas fases restantes carecen de sentido, pois "non van mellorar nin retirar tráfico da cidade".
O portavoz popular fixo fincapé no "custo altísimo para as parroquias afectadas", mencionando que o proxecto impactaría a unhas 200 construcións, entre as que se atopa o colexio de Xeve. As zonas afectadas incluirían Bora, Santo André e Santa María de Xeve.
"Carece de sentido continuar con esta inversión e sería desperdiciar de maneira groseira o diñeiro público", asegurou Rafa Domínguez.
CONEXIÓN DA ESTRADA
A proposta do PP céntrase en aproveitar o diñeiro xa investido no tramo inicial e darlle un novo uso á A-57 que está en funcionamento
En consonancia, segundo manifestou Domínguez, coa liña da Xunta de Galicia polo desenvolvemento industrial, solicitan que o tramo finalizado se una aos polígonos do Campiño, que ten prevista unha ampliación con 166.000 metros cadrados, e A Reigosa, esixindo ao Goberno central a execución desa conexión directa e tamén coa AP-9 en dirección a Vigo.
Domínguez insistiu en que a AP-9, unha vez que se faga efectiva a promesa da súa liberación de peaxe, "cumprirá con esa función de circunvalación" de Pontevedra tan demandada. Por iso, reclaman que a A-57 se paralice e queden sen executar as fases da Ermida-Pilarteiros e de Pilarteiros-Barro.
"Queremos aproveitar as infraestruturas xa realizadas e darlle un sentido", afirmou o portavoz, engadindo que non se pode permitir que continúe "unha infraestrutura deseñada no anterior século" que agora precisa un investimento "mil millonario".
O PP espera a "comprensión dos outros partidos" da corporación, BNG e PSOE. para apoiar esta moción que busca evitar o malgasto nunha "infraestrutura innecesaria e carísima".