Seis meses e medio despois do inicio da pandemia da covid-19, o centro penal da Lama confirmou o seu primeiro positivo na enfermidade. Trátase dun interno que saíu á rúa porque lle concedían un terceiro grao e, ao regresar á prisión, foi posto en corentena e sometido a unha proba PCR.
A forma na que se detectou o positivo limita moito as posibilidades de contaxio a outros reclusos ou ao persoal da prisión, pois descubriuse como froito dos estritos protocolos de seguridade que se aplican no centro a todas as persoas que chegan procedentes da rúa.
Fuentes oficiais de Instituciones Penitenciarias confirmaron o positivo, que se detectou despois de que este luns o interno fose sometido a unha proba PCR.
Segundo puido saber este xornal, ao interno concedéuselle o terceiro grao e saíu á rúa, pero, por resolución xudicial, tivo que volver a segundo grao e, por tanto, regresar ao centro. Ao regresar, púxoselle en corentena preventiva no módulo de Ingresos e realizóuselle a citada PCR sen que chegase a estar en contacto con ningún outro preso.
O positivo é o primeiro no centro penal da Lama desde o inicio da pandemia e, tras detectarse, activouse o protocolo anti covid-19, polo que estará illado ata que supere a enfermidade, para evitar contaxios a traballadores e internos.
En Galicia xa se rexistraron antes contaxios no centro coruñés de Teixeiro, pero no penal pontevedrés tan só un falso positivo.