Representantes de Augas de Galicia e dos concellos de Pontevedra, Poio, Marín, Sanxenxo, Bueu, Vilaboa e Ponte Caldelas mantiveron este venres un encontro no que o Executivo galego expuxo a súa iniciativa para dotar á comarca dunha estrutura de gobernanza conxunta, que regule e unifique as concesións actualmente vixentes para as captacións de auga no río Lérez e no encoro do Pontillón de Castro.
O novo modelo permitiría transitar desde o actual sistema centralizado no concello de Pontevedra cara a unha xestión supramunicipal baseada na codirección e coxestión por parte de todos os concellos implicados.
Esta mancomunidade de municipios permitirá realizar unha "xestión máis eficiente, sostible e equitativa" do abastecemento de auga potable e "afrontar con maiores garantías posibles situacións de seca na contorna".
Os responsables do organismo hidráulico autonómico informaron aos Concellos de cal é a situación actual do sistema e das solucións que se propoñen.
Entre os datos expostos, destaca que a demanda conxunta da ría acada os 10,8 hectómetros cúbicos anuais, abastecidos fundamentalmente desde as captacións do Lérez e do Pontillón de Castro, dúas fontes imprescindibles para garantir o servizo especialmente nos meses de estiaxe.
En paralelo, a Xunta tamén trasladou a necesidade de avanzar en solucións de xestión eficientes como a alternativa de recuperar a chamada arteria litoral -unha canalización existente paralela á costa que está inoperativa-, pois evitaría ter que bombear o 100% do caudal destinado aos concellos de Marín e Bueu, con altos custos enerxéticos.
A súa reparación, que requiriría dun investimento de entre 7 e 10 millóns de euros, permitiría aforros superiores aos 250.000 euros anuais e reforzaría a eficiencia global do sistema.
CUSTO ANUAL
De feito, segundo o estudo económico achegado, o custo de explotación anual do sistema mancomunado situaríase en arredor dos 2,5 millóns de euros, cifra que podería reducirse coa restablecemento desta arteria litoral.
A Xunta considera que a constitución dunha mancomunidade como entidade de gobernanza conxunta, para a realización de investimentos en almacenamento e garantías de regulación, así como para avanzar nunha xestión única son claves para o futuro da auga nos concellos da contorna da ría de Pontevedra.