En 2016, Protección Civil de Caldas realizou 849 servizos, segundo informou o xefe desta agrupación, José Sieiro, durante a presentación do balance da actividade do pasado ano.
En apenas tres anos esta agrupación está a moi pouca marxe de triplicar o número de intervencións, o que valoran como unha "consolidación" deste servizo "de vital importancia e esencial no concello".
Sieiro debullou as intervencións máis significativas nas que prestaron asistencia a 98 accidentes de circulación, 115 intervencións por animais, 40 en incendios urbanos e forestais, 395 operativos de protección civil e 11 sanitarios en apoio ao servizo de Urxencias Médicas de Galicia.
O pasado ano incorporouse á dotación unha embarcación neumática e un desfibrilador externo semiautomático, tamén se integrou o servizo na Rede Tetra de comunicacións de emerxencia da Xunta e implementouse a aplicación informática i-Ega que permite a conexión directa a tempo real coa sala de emerxencias 112 Galicia.
Outra das súas actividades son as charlas educativas en centros escolares.
Ademais, o Concello de Caldas de Reis colabora coa Consellería do Medio Rural na loita contra a avespa velutina. Neste marco, tan só entre os meses de setembro a decembro atenderon 21 avisos. E a partir de abril poñerase en marcha unha campaña de información a toda a cidadanía.
PETICIÓN CAMIÓN AUTOBOMBA
A maiores, o xefe da agrupación de Protección Civil de Caldas, José Sieiro, sinalou a "necesidade contrastada" de dotar ao concello dun camión motobomba que reforce a atención das emerxencias locais.
O Concello solicitou formalmente a cesión dun destes vehículos á Xunta de Galicia.