A organización estudantil Erguer. Estudantes da Galiza levou este 15 de abril ás aulas galegas unha xornada de folga.
A mobilización serviu para denunciar a "privatización do ensino público" e reclamar un cambio de rumbo nas políticas educativas.
Esta folga enmárcase na campaña "Prívannos dun futuro!", que o colectivo puxo en marcha a finais do pasado ano.
A convocatoria xurdiu tras varias asembleas nas que o estudantado decidiu dar o paso e esixir tanto ao Goberno central como á Xunta de Galicia o "fin inmediato das políticas neoliberais" que, segundo denuncian, están a afectar aos servizos públicos, especialmente ao ensino.
En Pontevedra, a protesta concretouse nunha concentración ao mediodía na Praza da Peregrina, onde se reuniron arredor de trinta estudantes.
Durante o acto, lanzaron consignas contra o actual modelo educativo e reclamaron un maior compromiso co ensino público.
A mobilización contou tamén co apoio de colectivos como CIG-Ensino e Galiza Nova, que arrouparon as reivindicacións.
Entre as principais demandas destacan o rexeitamento á FP dual, o incremento do investimento educativo en todos os niveis e a creación dun sistema público galego de residencias estudantís.
