O Pazo da Cultura de Pontevedra converteuse este mércores 23 no escenario da reeleción de Ramón Vidal Trillo, por terceira vez consecutiva, como secretario xeral da Unión comarcal de UGT Pontevedra, Arousa e Deza, obtendo o apoio unánime dos 51 delegados e delegadas participantes no Congreso.
O coñecido sindicalista, que leva case dúas décadas á fronte da organización, continuará liderando o proxecto sindical nunha etapa que se perfila como de consolidación, acompañado por un equipo directivo que combina experiencia e renovación.
A nova Comisión Executiva, ratificada tamén polo plenario, queda conformada por María Pazos Brea na secretaría de Organización; María Teresa Filgueira Prol, que asume a secretaría de Administración; Estrella Fernández Buján ao cargo da secretaría de Formación; e Óscar J. González González, que ocupará a secretaría de Acción Sindical.
Completan o equipo Encarnación Cochón Moledo como secretaria de Atención a Afiliados e Afiliadas, Javier Gayoso Collazo na secretaría de Innovación e Saúde Laboral, e José Vázquez González como delegado de UGT Arousa.
Ademais, o congreso elixiu a Luis Modia Ramos e Sandra Balea Moreira como representantes da Unión Comarcal no Comité de UGT-Galicia, reforzando así a presenza desta estrutura territorial nos órganos de decisión autonómicos do sindicato.
A traxectoria de Vidal Trillo no mundo sindical é extensa e consolidada. Iniciou o seu camiño como delegado sindical no Centro de Menores Avelino Montero de Pontevedra, onde traballaba como educador, para posteriormente presidir o Comité de Empresa da Delegación Provincial de Traballo.
No 2005 tomou o relevo de Domingo Barros como Secretario Comarcal de UGT Pontevedra, e desde entón ten liderado os procesos de integración territorial coas comarcas de Arousa e Deza, configurando unha das estruturas sindicais máis relevantes de Galicia.
Con este novo mandato, que se estenderá polos próximos catro anos, Ramón Vidal Trillo ten como obxectivo manter o compromiso coa defensa dos dereitos laborais das traballadoras e traballadores nunha zona que considera de gran relevancia económica e industrial para Galicia.
