Os sete militares da Brigada Galicia VII, Brilat, que o martes resultaron feridos durante un exercicio de instrución en León evolucionan de forma favorable e un deles recibirá a alta médica na tarde deste xoves.
Fuentes militares confirmaron que os outros seis van permanecer ingresados en Complexo Asistencial Universitario de León, aínda que un deles está previsto que reciba a alta ao longo da mañá do venres.
Os outros cinco seguirán hospitalizados "algún día máis" en observación, pero estas mesmas fontes confirman que progresan favorablemente e responden ben á medicación.
Ata León desprazáronse as familias dos sete feridos, que lles acompañaron durante estes días no hospital. Ademais, están con eles compañeiros da Brilat que acompañan de forma permanente aos familiares e feridos e actúan de ligazón entre o hospital e as familias.
Os sete feridos son seis soldados e un sarxento destinados no Batallón de Zapadores VII con sede na Base Xeral Trasfogueiro de Figueirido e estaban a realizar un exercicio de instrución e adestramento no campo de tiro e manobras do Teleno, en Luyego, na provincia de León.
Resultaron feridos, segundo confirmou o Ministerio de Defensa, ao sufrir un accidente cun Vehículo de Combate de Zapadores ( VCZ), un vehículo blindado, sobre as 18:50 horas do martes 23 de novembro. O vehículo caeu por un noiro e logo envorcou.