Operarios do Concello de Vilagarcía de Arousa recuperaron na mañá deste luns 2 de xuño a emblemática cruz do Monte Xiabre, desaparecida hai unha semana, tras realizar unha roza perimetral na contorna do miradoiro.
A estrutura, que forma parte do patrimonio sentimental da vila, apareceu oculta entre a vexetación próxima.
As investigacións confirmaron que non se tratou dun roubo, senón dun acto vandálico no que a cruz foi zarandeada violentamente ata arrancala do seu soporte e posteriormente lanzada ao baleiro.
No lugar orixinal da instalación aínda permanecían restos metálicos que non chegaron a desprenderse completamente.
Segundo informou o concelleiro de Turismo, Álvaro Carou, a cruz será soldada e recolocada no seu emprazamento orixinal nos vindeiros días.
"Forma parte da historia de Vilagarcía e é un símbolo do noso concello, polo que era fundamental a súa recuperación", destacou o edil.
A peza, elaborada e instalada polos alumnos da escola de aprendices de Renfe hai varias décadas, posúe un importante valor sentimental e histórico para a comunidade, malia carecer dun elevado valor material.
O miradoiro de Xiabre, dende onde se divisa unha panorámica excepcional da ría, converteuse nun dos principais atractivos turísticos desta zona.