É habitual a súa presenza en Sanxenxo nos últimos tempos, pero non o é tanto a súa participación en actos públicos.
O rei emérito, Juan Carlos I, participou este venres na clausura de 'Bautismos de Mar', unha actividade da Mancomunidade do Salnés que se desenvolve no Real Club Náutico de Sanxenxo.
No acto o monarca entregou os diplomas correspondentes aos participantes do Centro de Educación Especial Amencer-Aspace.
Desde abril de 2024, Bautismos de Mar permitiu achegar o mundo da vela a usuarios deste centro e tamén a máis de 470 escolares de entre 6 e 12 anos pertencentes a centros educativos dos municipios asociados á Mancomunidade, é dicir, O Grove, Sanxenxo, Meaño, Cambados, Ribadumia, Meis, A Illa de Arousa, Vilanova de Arousa e Vilagarcía de Arousa.
Trátase dun proxecto que conta co respaldo do club náutico e financiamento a través de fondos europeos Next Generation EU.
Combina formación teórica nos centros escolares con xornadas prácticas de navegación no mar.
"Con Bautismos de Mar non só fomentamos o deporte náutico entre os máis pequenos, senón que reforzamos a nosa cultura marítima e sensibilizamos sobre o valor do patrimonio natural que nos rodea", sinalou o presidente da Mancomunidade, David Castro.
"É un investimento directo no futuro do Salnés e o seu vínculo co mar. Ademais, foi unha honra contar coa presenza do rei Don Juan Carlos nesta entrega de diplomas, un xesto que reforza o carácter inclusivo e o alcance social deste programa", explicou sobre a iniciativa.