Tras o peche do restaurante Ultramar, que xestionaba Pepe Vieira desde 2015, ao rematar o período de concesión, o Museo de Pontevedra xa busca quen o queira substituír.
O novo contrato dará continuidade ao uso que tivo o baixo do Edificio Sarmiento na última década como restaurante e terraza, un uso que a Deputación de Pontevedra quere manter ao entender que se trata dun lugar xa consolidado como punto de encontro lúdico e cultural.
Quen logre facerse coa futura concesión, segundo recolle o proxecto de licitación, poderá xestionar estas instalacións como cafetería e restaurante durante seis anos, prorrogables outros catro. É dicir, un máximo de dez anos.
O canon anual mínimo de licitación está establecido en 22.563,34 euros.
A empresa que resulte adxudicataria terá que executar obrigatoriamente no baixo do Edificio Sarmiento unha serie de obras de mellora da accesibilidade nos aseos, de reparación de pavimentos e de control de cheiros.
A Deputación estimou en 75.527 euros máis IVE o custe desta actuación, que a concesionaria deberá executar no prazo máximo de seis meses desde a recepción das autorizacións sectoriais e da licenza de obras ou, en todo caso, dentro dos primeiros seis anos de contrato.
Esta cantidade, que asumirá inicialmente o titular do restaurante, amortizarase mediante a redución do canon da concesión durante eses primeiros seis anos.
O restaurante está situado na planta baixa do edificio Sarmiento do Museo, se ben conta con acceso independente. Ocupa unha superficie duns 160 metros cadrados distribuídos en comedor, cociña exterior, cociña-office interior, almacén e cámaras.
A eles súmanse os 168 metros cadrados do espazo reservado para cafetería, nese mesmo baixo, e o espazo de terraza situado entre os edificios Sarmiento e Castelao, ata un total de 468,48 metros cadrados.
O procedemento de adxudicación outorgarase en réxime de concorrencia competitiva.
O 49% da valoración recaerá en criterios de xuízo de valor. Valorarase, por unha banda, o concepto gastronómico, a identidade de marca, a integración patrimonial e o deseño de espazos para todo este complexo de restaurante e cafetería.
Debe ser unha proposta que ademais de articular un relato culinario "singular e plenamente coherente" co discurso do museo, presente un deseño integral dos espazos interiores e da terraza que realce tanto o inmoble patrimonial como a experiencia do visitante.
Ademais, tamén se valorará a experiencia e currículo do equipo humano e a estabilidade contractual, así como a calidade do estudo de mercado e da estratexia comercial.
O 51% restante da valoración recaerá na proposta de incremento do canon mínimo anual e no compromiso de aplicación dun sistema de calidade UNE ou Q de calidade turística.