O mal estado do palco de música situado na Alameda levou ao Concello de Marín a restrinxir o acceso ao mesmo de maneira urxente.
A administración local tomou a decisión tras os resultados dun exame técnico encargado á empresa Enmacosa, e que evidencian a importante deterioración na cuberta e partes da estrutura do palco.
Esta inspección revelou que a estrutura metálica aérea de piares, capiteis e contorneados arquitectónicos de fundición existentes presenta síntomas de oxidación en varios puntos, así como a balaustrada dos laterais, con algunha perforación puntual na chapa.
Ademais, informa o Concello, atopáronse varias fisuras e pezas de sillería de granito rotas nos pedestais dos vértices da estrutura do propio palco, con roturas considerables nas bases e fisuras nos encontros laterais.
Tamén destaca o resultado da inspección ás cuberta, que presenta elementos de madeira en estado avanzando de deterioración, con risco de desprendemento que tamén afecta os focos de iluminación.
Estes danos débense principalmente ao mal estado das pezas de lousa que conforman a cuberta exterior, que se atopan desprazadas e provocan continuas filtracións de auga.
Seguindo a recomendación dos técnicos, o goberno local ordenou tomar medidas urxentes de seguridade, restrinxindo o acceso ao palco de música e instalando valos conformando un perímetro de separación.
Para atallar esta situación o Concello de Marín avanza que solicitou un estudo pormenorizado que sirva de base para a redacción do proxecto de restauración do palco, un elemento considerado de alto valor patrimonial en pleno centro da vila.