Na última entrega do ano da serie "A cociña gourmet en conserva" imos preparar uns rolos salgados, lixeiros e moi vistosos, ideais como aperitivo, entrante ou petisqueo para estas datas do Nadal; e onde aproveitaremos todas as calidades da cabala de Conservas Pescamar.
A cabala destaca pola súa achega en proteínas de alto valor biolóxico e polo seu contido en ácidos graxos poliinsaturados Omega 3. Ademais, ofrece un sabor equilibrado que combina á perfección cos matices cítricos e cremosos desta receita.
Para preparar uns deliciosos Rolos de crepe salgada con crema cítrica de cabala Pescamar necesitamos os seguintes ingredientes:
- 1 lata de Filetes de cabala do Sur en aceite de xirasol Pescamar
- 80 g de salmón afumado en tiras finas
- 80 g de fariña
- 2 ovos
- 200 ml de leite
- 1 cullerada de manteiga
- 1 chisco de sal
- 1 culleradiña de té matcha en po
- 150 g de queixo crema
- 1 culleradiña de reladura de limón
- 1 culleradiña de reladura de laranxa
- 1 culleradiña de zume de limón
- febras de ceboliño para decorar
Elaboración:
Empezamos preparando a masa das crepes salgadas. Nun bol mesturamos a fariña, os ovos, o leite, a manteiga (previamente fundida), o sal e o té matcha. Batemos ata obter unha mestura homoxénea e sen grumos. Deixamos repousar a masa uns 20 minutos.
Quentamos unha tixola antiadherente e a engraxamos lixeiramente con manteiga. Vertemos unha fina capa de masa e cociñamos por ambos os lados ata que a crepe estea feita pero manteña certa elasticidade. Repetimos o proceso ata rematar con toda a masa. Reservamos as crepes e deixamos arrefriar.
Para o recheo, escorremos os Filetes de cabala do Sur en aceite de xirasol Pescamar e os esmiuzamos suavemente. Nun bol mesturamos o queixo crema (do que previamente apartamos dúas culleradas para a decoración final) coa reladura de limón, a reladura de laranxa e o zume de limón. Incorporamos a cabala e removemos con coidado ata integrar todos os ingredientes.
Estendemos cada crepe sobre unha superficie lisa e cubrimos cunha capa uniforme da crema cítrica de cabala. Colocamos a continuación unha tira fina de salmón afumado e enrolamos con firmeza. Cun coitelo afiado, cortamos cada rolo en pequenas porcións cilíndricas.
Colocamos os rolos sobre unha bandexa e decorámolos cun pequeno curuto de queixo crema axudándonos de dúas culleriñas e, por enriba, unhas febras de ceboliño ou calquera herba fresca. Servimos frío.
