Poio acolle esta fin de semana a celebración da XIV Concentración Moteira do Motoclub A Rosa dos Ventos, que regresa tras o parón do pasado ano.
A cita, organizada coa colaboración do Concello, reunirá durante tres días por centos de participantes chegados de distintos puntos de España, Portugal e mesmo de Melilla e Canarias.
A presentación da programación acudiron o alcalde, Ángel Moldes; o concelleiro de Deportes, Cándido Muíños; e representantes do club.
Moldes agradeceu o traballo da entidade e destacou o impacto turístico e económico do evento, que axuda a consolidar a Poio como unha referencia do motociclismo en Galicia e xera un beneficio para a hostalaría e o comercio local.
A concentración arrincará o venres 10 ás 22:30 horas coa tradicional ruta dos fachos en recordo dos compañeiros ausentes. Despois terá lugar o concerto do grupo América de Vigo na Seca.
O sábado haberá unha sesión vermú, xogos moteiros, concursos e animación a cargo da batucada Os Queimatasas, antes do tradicional paseo polas rúas do municipio. Ás 18.30 horas celebrarase unha degustación de mexillón galego para as persoas inscritas.
Un dos momentos máis esperados chegará coa exhibición de stunt do portugués Cajó Stunt Rider, que actuará por primeira vez na provincia de Pontevedra. Haberá dous pases: un antes da cea de confraternidade e entrega de trofeos e outro a medianoite, acompañado polo espectáculo de lume de Amelie Trotet. A música continuará cos concertos de Martes Mal e Cintia e Rose Power Live Dúo, ademais da sesión da discoteca móbil con DJ Rubén Díaz.
A concentración concluirá o domingo cunha ruta moteira, con paradas e petiscos para os participantes. Tamén se celebrará a tradicional comida de confraternidade na carpa instalada na Seca.
A organización lembra que tanto as rutas como os concertos están abertos a todos os públicos e que o 85% das prazas xa están ocupadas. A inscrición poderá formalizarse de forma presencial o venres.