Sabor a tradición: roscas e ovos de Pascua enchen os escaparates das pastelarías de Pontevedra

A Semana Santa en Pontevedra segue sendo sinónimo de azucre, tradición e escaparates cheos de cor, pero detrás de cada rosca e cada ovo de chocolate hai un longo proceso de traballo e orixinalidade. As confeitarías e panadarías máis emblemáticas da cidade xa comezaron a recibir grandes colas este luns Santo, nas que conviven receitas de hai décadas.

Tras visitar os establecementos Capri, Solla e Acuña, todos coinciden en que a tradición segue viva, pero se está perdendo a medida que pasan os anos.

En Capri, Menchu Collado, a encargada do local, resúmeo con naturalidade: "nesta data, sobre todo os ovos, os biscoitos e as roscas". Son os clásicos que nunca fallan, os que seguen decorando os locais cada Semana Santa.

Con todo, "antes se vendía máis rosca e de tamaños maiores. Agora a xente cada vez tende a tamaños máis pequenos e a acompañalo con chocolate", explica. Ademais, comenta que debido ao cambio no estilo de vida, actualmente "os nenos teñen de todo todos os días".

Na Confitería Solla tamén notaron esta redución da demanda, aínda que aínda se atopa en altos niveis.

Mayka Solla, a propietaria do comercio, sinala que a rosca segue sendo o produto máis característico, pero xa non se compra soa: "os ovos ás veces lévanos acompañando unha rosca".

Con todo, se hai algo que cambiou con respecto ao pasado é quen toma as decisións de compra. "Hai nenos que son os que ditan o que se compra", aclara Mayka Solla, pois cada vez se piden formas máis concretas e personalizadas: "onte vendín un mando da Play e hoxe viñéronme preguntando por un Pokémon".

As figuras de chocolate pasaron de ser coellos e outros animais a reflectir personaxes animados da actualidade, adaptándose ás demandas dos máis novos.

Mentres tanto, en Acuña, Andrés Acuña afirma que a súa forma de traballo apenas cambiou, "as receitas son as tradicionais de toda a vida: fariña, ovo, manteiga, azucar, limón e laranxa". Desta forma, recalca que o aspecto diferenciador do seu produto é que "por cada quilo de fariña poñemos doce ovos, e non leva nada de auga".

Doutra banda, o proceso de elaboración é longo e complexo: "empezamos ás doce da noite coa masa, despois temos que continuar ás dúas ou tres da mañá… e cando sae unha rosca son as seis ou sete", describe. En total, "cinco ou seis horas" de traballo continuado para cada fornada. Unha rutina que se repite día tras día durante as festas.

Os números de roscas cociñadas durante toda a semana son moi elevados. En Solla e Capri contan cuns 500 e 600 quilos, respectivamente. En cambio, debido á gran cantidade de Acuñas na cidade, chegaron a vender 5.000 roscas en anos anteriores, estimando as mesmas vendas para 2026.

Estas cantidades confirman a importancia destas datas para os comercios locais. Na Confitería Capri recoñecen que é unha das épocas máis intensas do ano: "Moita venda, moito traballo e moita satisfacción".

A pesar de todo, detrás desta actividade, todos comparten unha preocupación: o aumento dos custos de ingredientes básicos, especialmente o chocolate e os ovos.

Ante esta situación, as panadarías e confeitarías deben decidir entre manter a clientela e non ter moitas perdas. Sen embargo, a maioría coinciden en estratexia, sen incrementar os prezos.

"Este ano non os subín… a xente non acepta que a rosca poida custar tanto", afirma Mayka Solla que mantén o quilo a 24 euros, mentres que en Acuña continúa en 23 euros e en Capri aumenta a 26 euros.

Todas sosteñen que o máis importante é a planificación, por iso prefiren que os clientes encarguen as roscas, co fin de non desperdiciar produto e calcular as unidades necesarias: "adoitamos pecar de quedarnos sen mercadoría, pero o preferimos", anota Menchu Collado.

En Solla buscan axustar a produción para conseguir o resultado máis fresco posible, "se non encargas, arríscasche a que non haxa".

Con respecto á perda de tradición, Andrés, desde Acuña explica que os ovos son "un doce típico dos padriños, de toda a vida", pero agora, ademais de haber cada vez menos padriños, estes optan por outros agasallos máis aceptados como roupa ou diñeiro.

Aínda así, a Semana Santa segue tendo algo especial. Mayka Solla aproveita a gran afluencia de clientes para pór a proba novos produtos, que despois eliminará para ver si a xente os pide. Ademais, "a tenda está súper bonita e está chea, veñen nenos, xente de fóra…", comenta con agarimo.

Doutra banda, o bo tempo podería axudar a alcanzar un maior rendemento, grazas ao turismo e o ambiente.

En definitiva, se hai algo que queda claro tras escoitar a Capri, Solla e Acuña é que a tradición non desaparece, senón que cambia e se adapta, mentres que os clientes continúan enchendo os locais.