A parroquia de Viascón, en Cerdedo-Cotobade, ten todo preparado para vivir dous días de intensa celebración coas festas na honra de Santa Bárbara e Santa Lucía.
O alcalde, Jorge Cubela, xunto con membros da Comisión de Festas, desvelou esta martes o cartel dunha programación pensada para todas as idades, que terá lugar os vindeiros venres 12 e sábado 13 de decembro.
Os festexos darán comezo o 12 coa misa solemne adicada a Santa Bárbara ás 12:30 horas.
A noite garda un dos momentos máis esperados: a tradicional cea de Santa Bárbara, a partir das 21:00 horas.
O menú inclúe empanada; lagostinos preparados á prancha e tamén cocidos; carne rinchada con patacas; sobremesa; viño; auga e café, cun prezo de 30 euros para adultos e 15 euros para nenos de entre 5 e 11 anos. A velada prolongarase coa música de DJ Will.
O sábado 13 será a quenda de Santa Lucía, cunha xornada que vai iniciarse coa misa solemne ás 11:00 horas, seguida dunha segunda misa e procesión ás 12:30 horas, que contará co acompañamento das Cantareiras Bulideiras, culminando cunha sesión vermú.
Ás 12:00 horas, o ceo de Viascón iluminarase cunha gran tirada de fogos artificiais. A noite rematará cunha gran verbena a partir das 21:00 horas, amenizada pola actuación de La Banda de Ayer e DJ Dolce Vita, e unha popular chocolatada para todos os asistentes.
Para garantir o confort da veciñanza e visitantes, todos os eventos celebraranse baixo carpa climatizada.
O alcalde Jorge Cubela salientou a importancia destas festas para a identidade de Viascón, subliñando que son "un exemplo do que representa o noso rural: tradición, participación veciñal e unha enorme capacidade para unir á xente arredor da cultura e da convivencia".