Unhas 130 persoas participaron este domingo na andaina pola igualdade organizada en Sanxenxo dentro da programación municipal do 8M, Día Internacional da Muller.
O punto de partida para a saída foi o edificio de Servizos Sociais situado en Portonovo, sede do Centro de Información ás Mulleres (CIM) de Sanxenxo.
Diante deste lugar inaugurouse o primeiro banco morado do municipio co lema "A igualdade é o lema da liberdade".
Tres xeracións distintas de mulleres foron as encargadas de cortar o cordón inaugural e estrear este simbólico mobiliario urbano.
A continuación, os participantes na andaina completaron o percorrido programado, pasando polo Miradoiro da Peixeira, o paseo de Silgar e a Praza dos Barcos.
No punto final desta actividade houbo un concerto do grupo tradicional Soalleira.