O goberno municipal de Sanxenxo executou a primeira clausura temporal dun local de lecer nocturno en Portonovo por incumprir a obrigación de conectar o seu limitador ao sistema de control acústico municipal.
Este sistema, coordinado pola Policía Local, busca conciliar a actividade de lecer nocturno co dereito ao descanso dos veciños.
Con esta plataforma vixíase en tempo real os niveis de ruído, o que facilita que se tomen as medidas pertinentes para reducilo.
Pero para iso, en todo caso, é preciso que os sonómetros e limitadores de volume dos locais se conecten ao sistema.
Tras superar o prazo concedido aos establecementos e recibir varias denuncias veciñais por ruído, o Concello procedeu ao peche deste primeiro establecemento e ten en marcha, polo mesmo motivo, outros expedientes similares a outros locais.
A ordenanza de protección contra a contaminación acústica é a que recolle esta suspensión de actividade cando non se cumpra co envío obrigatorio dos datos dos dispositivos de control de son.
Ademais, tamén está en trámite unha denuncia a outro establecemento en Sanxenxo por exceso de aforamento, unha infracción grave segundo a lei de espectáculos públicos e actividades recreativas.
As multas por esta infracción oscilan dos 30.000 aos 600.000 euros e mesmo poden levar á clausura ou suspensión temporal do local por até un ano.
Engade Pontevedra Viva como fonte preferida de Google de balde
Mantente informado coas últimas noticias de actualidade.