O pleno extraordinario do Concello de Sanxenxo aprobou este venres 12 de forma inicial a creación dunha Zona de Protección Acústica Especial (ZPAE) nos núcleos urbanos de Sanxenxo e Portonovo.
A medida saíu adiante co voto a favor do Partido Popular e a abstención dos dous grupos da oposición, o BNG e o PSOE. A iniciativa parte dun estudo sonométrico realizado a principios de abril que reflectiu rexistros de ruído por encima dos 55 decibeis nocturnos permitidos pola normativa galega en áreas residenciais.
A nova regulación entra agora nun período de exposición pública dun mes para a presentación de alegacións antes da súa remisión definitiva ao pleno.
Desde o goberno de Telmo Martín defenderon a necesidade de aplicar esta figura legal para compatibilizar a actividade hostaleira co descanso veciñal.
Pola súa banda, o portavoz do BNG, Octavio González, xustificou a abstención do seu grupo ao considerar necesario coñecer a opinión do sector afectado e demandou aclaracións sobre a aplicación e o destino das sancións.
A sesión plenaria tamén serviu para aprobar, co respaldo en solitario do PP, a abstención do BNG e o voto en contra do PSOE, a actualización do pago mensual á empresa concesionaria do servizo de recollida de lixos e limpeza viaria.
A achega municipal increméntase dos 136.311 euros actuais a un total de 163.743 euros ao mes.
Como contrapartida, a firma adxudicataria asumirá a adquisición de 210 colectores novos, 100 de carga traseira e 110 de carga lateral, por un importe de 125.000 euros máis IVE.
Este incremento e o estado do servizo centraron as críticas da oposición. O BNG reprochou os cambios de criterio do executivo municipal na tramitación do novo contrato de residuos tras vencer a anterior adxudicación.
A formación nacionalista expuxo que o paso dun concurso público de licitación á proposta actual de xestión directa retarda os prazos, de forma que non finalice ata xaneiro de 2027, e criticou as deficiencias do servizo nas zonas rurais do municipio.
Pola súa banda, o PSOE baseou o seu rexeitamento nunha resolución do Tribunal Administrativo de Contratación Pública de Galicia (TACGal) referida ao concurso principal deste servizo, valorado en máis de 40 millóns de euros.
Segundo o grupo socialista, o órgano autonómico estimou parcialmente un recurso contra a decisión do Concello de non adxudicar ese contrato masivo, obrigando a retrotraer o procedemento debido a un defecto de forma na comunicación.
Os socialistas lamentan a falta de previsión técnica do goberno local na tramitación da maior partida económica do municipio.