Sanxenxo confirma unha tendencia á baixa en criminalidade ao diminuír as infraccións penais un 11,35% durante o primeiro cuadrimestre de 2026 en comparación co mesmo período de 2025, pasando de 229 a 203 delitos.
Os datos, presentados este xoves na Xunta Local de Seguridade presidida polo alcalde, Telmo Martín, e o subdelegado do Goberno, Abel Losada, sitúan o municipio no "mellor escenario posible", segundo destacou Losada.
O subdelegado puxo en valor a "excelente coordinación" entre a Garda Civil e a Policía Local, presentes no acto, a cal cualificou como "fluída e permanente", á vez que subliñou que esta colaboración é fundamental para responder o aumento da actividade turística e garantir a seguridade da veciñanza e dos miles de visitantes que acoden ao municipio no verán.
Aínda que as infraccións penais han diminuído, Sanxenxo rexistrou un incremento do 8,1% no número de investigados e detidos, un dato que, segundo o subdelegado, evidencia unha maior capacidade de resposta policial e unha actuación máis eficaz fronte ás condutas delituosas. Entre os indicadores máis favorables destaca a diminución de delitos leves, delitos contra o patrimonio e furtos de pequena contía.
Losada asegurou que "Sanxenxo é un concello seguro" e destacou que os niveis de criminalidade son inferiores á media estatal. A tendencia negativa mantense en todos os períodos analizados, cun descenso superior ao 20% en abril e unha redución anual do 4,20% en 2025 respecto de 2024.
Durante a Xunta Local de Seguridade repasáronse os principais eventos previstos para este verán, como son o concerto de Juan Luís Guerra, o festival Costa Feira e a Concentración Mototurística, ao requirir un maior reforzo policial que garanta a seguridade.
"Non se trata de reforzar cun número concreto senón de estar nos momentos nos que fai falta. O importante é que a xente se sinta segura cando veña a Sanxenxo", asegurou o rexedor.
Entre os asuntos que se abordaron durante a Xunta foi a necesidade de que o semáforo das Salinas estea en funcionamento durante o verán, axustando os tempos de espera para interferir o menos posible no tráfico, pero garantindo o paso seguro dos peóns.
Tamén se analizaron os datos relativos á violencia de xénero, destacando como dato positivo o incremento das denuncias, ao considerar que reflicte unha maior confianza das vítimas nos recursos de protección e acompañamento dispoñibles.
Actualmente, o sistema VioXén mantén activos en Sanxenxo 41 casos: 33 con risco baixo, 7 con risco medio e 1 con risco alto.
Por outra banda, analizouse a prevención fronte ás estafas telemáticas e outros delitos cometidos a través de novas tecnoloxías. Neste sentido, os responsables policiais destacaron o traballo de información e sensibilización realizado con colectivos vulnerables e avanzaron a necesidade de reforzar as accións dirixidas á poboación máis nova.
Tras a Xunta Local de Seguridade, Abel Losada e Telmo Martín participaron no Auditorio Emilia Pardo Bazán na clausura dunha xornada de educación e prevención viaria dirixida a persoas maiores, organizada pola Dirección Xeral de Tráfico e a Subdelegación do Goberno en Pontevedra.
Losada lembrou a especial incidencia dos atropelos mortais na provincia durante o que vai de ano, con oito peóns falecidos por atropelo entre o 1 de xaneiro e o 7 de xuño en vías interurbanas.
Citou o recente sinistro mortal en Areas como exemplo da necesidade de reforzar a concienciación e a prevención de peóns e condutores para reducir a sinistralidade viaria.