Sebastián Castella sae a ombreiros de Pontevedra no seu aniversario de prata

O centro da praza de touros de Pontevedra lucía na apertura da feira unha gran lona que conmemoraba a efeméride do coso sanroquino este 2025: 125 anos de arraigamento taurino. Ademais, tres xeracións da familia Lozano estaban presentes desde a calexa no ano en que cumpren cinco décadas xestionando este coso. Segue aumentando o colorido dos tendidos de peñas coa incorporación de gran número de mozos afeccionados. Tres cuartos de entrada nunha tarde de intensa calor na cidade do Lérez.

Sebastián Castella (rosa empoado e ouro)

O toureiro francés cumpre a próxima semana vintecinco anos como matador de touros e este de Pontevedra era o seu último compromiso antes de facer triplete na feira da súa localidade natal de Béziers para conmemorar o aniversario de prata. Un compromiso que saldou con saída aos ombreiros despois de cortar tres orellas ao seu lote.

'Colexial' (negro mulato bragado, de 550 quilos e aplaudido no arrastre) saíu do portón de curro con alegría. Recibiu unha única picada. Tras o terzo de banderillas, Castella iniciou a faena desde a firmeza dos seus pés - que descalzou a seguir - para ir consolidando unha faena que foi aumentando en envergadura. Sete quendas, a última por pases de manoletina co aceiro xa na man. Unha estocada enteira na que voou a franela e precisou un descabello. Rapidamente saíron os panos brancos nos tendidos e desde a presidencia concedíase a primeira orella da Feira.

'Tamborilero' (castiñeiro claro bragado, de 495 quilos e aplaudido no arrastre) foi brioso de saída tamén e tivo medido castigo co picador. Chegado o terzo de muleta Sebastián brindou unha faena ao público á que lle sobraron as tres quendas finais. A primeira con muletazos sentado no estribo, para continuar nos medios. Espremeu por baixo o animal - que chegou a caer un par de ocasións -, e a manifesta virtude de entrar á muleta. Antes de perfilarse para a sorte suprema soou o primeiro aviso. Estocada enteira cunha inmediata reacción entre o público. Concedida a primeira orella a afección insistiu ata ver outro pano no balconiño da presidencia.

José María Manzanares (azul rei e ouro)

'Chalinito' (negro bragado, meano, calcetero, de 525 quilos) e 'Flautista' (castaño chorreado de 475 quilos) foron o peor lote da tarde sabatina. A Manzanares o primeiro duroulle un asalto, ou o intento dunha primeira quenda deixando termos pugilísticos. A pesar da saída dun animal abanto - habitual do encaste - non tardou en responder ben aos primeiros lances. 'Chalanito' protagonizou a causa dos maiores 'ayes' entre o público: nunha desacertada entrada ao cabalo descabalgou ao picador (Juan Carlos Sánchez) deixándoo atrapado baixo o equino. Tres veces entrou co estoque, desenfundó o descabello, pero o finiquitaron varios puntillazos. Silencio e pitos no arrastre.

'Flautista' foi un bis na saída de chiqueros, case pedindo permiso para saír ao rodo, pero permitiu ao destro alacantino dar as únicas verónicas de resalte no festexo, rematadas cunha revolera. Dúas discretas entradas en varas. Iniciou o terzo de muleta con doblones. O animal tardeaba ao entrar ao engano e o destro coidaba baixar a altura da muleta. Insistiu coa man dereita até lograr unha sexta quenda aplaudida polo público. Asestou unha estocada enteira pero non de factura mortal. Volveu a blandir a cruceta sen chegar a empregala xa que esperou ata que o touro chegase ás táboas para caer. Silencio.

Emilio de Justo (mandarina e ouro)

Emilio de Justo lograba o seu obxectivo tras o percance sufrido en xullo na Feira de Santander, retomar a tempada taurina na Feira da Peregrina. 'Batutero' (negro de 510 quilos) presentouse no rodo brioso, leve castigo no primeiro terzo e correctos o tres partes de rehiletes. Doblones de inicio que deron paso a unha sucesión de aplaudidas quendas coa dereita e por naturais. Con entrega, verdade, e mostrándose a gusto no seu regreso. Pechou con manoletinas e o de peito plantando cara ao hastado. A orella estaba pedida, pero negoulla a espada e os tres descabellos. Aplausos e aplausos para o touro no arrastre.

O segundo 'Flautista' do festexo (castaño chorreado de 530 quilos), último da tarde, saíu querendo desentenderse do capote e por momentos rebrincado si o estremeño conseguía pasalo polo percal. Foi ao picador sen cobiza nin entrega. Con todo, de Justo viu posibilidades de tocar ese pelo perdido na anterior faena. Brinde ao público e repetiu o comezo de terzo con doblones. Dúas quendas aplaudidas de derechazos. Pausa de recuperación ao adversario e retomou con tres quendas de naturais. Xa co estoque na man, (que tirou) completou cunha última quenda de naturais cadenciosos e desmayados que propiciaron a ovación.

Desde a sorte contraria entrou o aceiro completo. Co brazo levantado a voz de "imos, imos!" de Justo agardaba que rápido se dobrase a res. 'Flautista' sen présa, foi camiñando ao refuxio das táboas e resistíndose a caer. Soou aviso e voou o triunfo cando foron necesarios até cinco descabellos e puntillazos a dor. O que a muleta estivo a pedir durante as súas faenas, negoullo o aceiro.