A Seca transfórmase nun sambódromo galego

Case 900 persoas, repartidas en doce comparsas de toda a provincia participaron na Pasarela de Comparsas do Entroido de Poio este venres á noite.

A Seca converteuse por unhas horas nun auténtico sambódromo galego, no que cada agrupación exhibiu as súas creacións, coreografías e temas musicais ante un público entregado.

O desfile arrancou desde o Camiño da Fábrica e percorreu A Seca ata chegar á carpa instalada na Reiboa, onde a festa continuou con intensidade grazas á discoteca móbil Dolce Vita. O evento rematou converténdose no arranque oficial do Entroido poiense, despois de que as choivas obrigasen a aprazar parte da programación.

Na terceira edición desta Pasarela de Comparsas participaron as agrupacións de Poio: As Sonecas, 100Tolos, Os Canecos e o Grupo de Entroido de Samieira, e desfilaron tamén AC Moreira A Tope, Alegría de Bora, Os da Caña, Os Retrincos, Os Paparrulos, Os Miúdos, Amigos dos Rapaces e Cor Café, creando un espectáculo que combinou imaxe, coreografía, música e interacción co público.

O ambiente era tan contaxioso que o público gozou dunha noite de Entroido memorable.

Cada grupo foi recoñecido polo seu esforzo e orixinalidade, recibindo distincións por aspectos como colorido, vestiario, animación, interpretación musical e posta en escena. Un desfile que reforzou o espírito festivo da localidade e puxo en marcha un Entroido que promete días cheos de actividades.

A programación continúa este sábado 28, co Enterro do Mexilón en Combarro, que partirá ás 21.00 horas do Peirao da Canteira ata a Praza da Chousa, acompañado polas comparsas locais.

O domingo 1 de marzo terá lugar o Desfile de Entroido en Campelo, con animación musical e premios de preto de 5.000 euros, no que se poderá participar de forma individual, en parella ou en comparsa.