A sede da Tesouraría Xeral da Seguridade Social (TGSS) en Pontevedra conta desde este xoves cun novo punto violeta destinado á información e prevención da violencia machista.
Con esta incorporación, xa son cinco os puntos deste tipo operativos nas oficinas da Seguridade Social da provincia.
O subdelegado do Goberno en Pontevedra, Abel Losada, visitou a nova instalación xunto ao director provincial da TGSS, Juan Herrera. Durante o percorrido, Losada destacou a relevancia destes espazos, que "son moito máis que unha pegatina", ao ir acompañados dunha formación específica impartida pola xefa da Unidade de Prevención da Violencia de Xénero da Subdelegación, María José Rodríguez.
A rede de puntos violeta continuará ampliándose ao longo do ano, con novas instalacións previstas nas sedes de Vilagarcía, Ponteareas e O Porriño.
Losada agradeceu ademais a implicación do persoal da Seguridade Social no desenvolvemento desta medida.
A posta en marcha destes puntos súmase ás actuacións xa realizadas en oficinas do Servizo Público de Emprego Estatal (SEPE) e da Axencia Tributaria.
A Subdelegación tamén impulsou a súa implantación no aeroporto de Peinador e, en colaboración co Colexio de Farmacéuticos, nas 437 farmacias da provincia.
Precisamente este xoves, a Subdelegación do Goberno en Pontevedra convocou un minuto de silencio polos últimos crimes machistas en España. En concreto, polos casos rexistrados o pasado 1 de decembro en Madrid, o 2 de decembro en Alacante e o 3 de decembro en Torrijos (Toledo).
Con estas son 43 as vítimas da violencia machista no que vai de ano en España.
