A incidencia da covid-19 creceu nas residencias e centros de maiores da área sanitaria de Pontevedra e O Salnés. Nas últimas 24 horas rexistráronse seis novos positivos que elevan a 13 o total de casos activos.
Segundo o balance oficial facilitado polo Servizo Galego de Saúde, entre os 23 novos positivos detectados na última xornada entre usuarios e traballadores de centros residenciais hai tres traballadores da residencia de maiores Nosa Señora Valvanera de Cambados, un traballador da residencia de maiores Saraiva Sénior de Pontrevedra e dous traballadores de DomusVi de Ribadumia.
En total, hai na área sanitaria, a maiores destes seis relatados, un máis en Nosa Señora Valvanera de Cambados (4 en total), dous traballadores na nosa Señora das Dores de Forcarei, un na residencia de Campolongo de Pontevedra, un na residencia Soremay de Pontevedra e un na Divina Pastora de Vilagarcía.
Os datos recollidos no balance oficial non contabilizan ningún usuario de residencias na área sanitaria de Pontevedra e O Salnés este luns.
En todo Galicia hai 284 usuarios e 181 profesionais contaxiados e faleceron ata o de agora 168 persoas en residencias e 210 en hospitais e residencias integradas.