Alberto Ribas non só viaxa: observa, escoita, saborea, sente. E cóntao. Detrás do blog Alvientooo, hai un narrador incansable, un buscador de momentos auténticos que transforma cada escapada nunha historia compartida. Desde a súa Pontevedra natal, este contador de experiencias percorreu medio mundo cunha mirada curiosa e próxima, retratando desde mercados locais ata ceos infinitos.
- Dime unha pregunta que non che guste que fagan.
Que me pidan que me defina.
- Como é a túa relación con Pontevedra?
De nacemento. Moi boa. Tamén é certo que viaxo moito polo que non noto esa sensación de que en Pontevedra ás veces parece que non hai moito que facer.
- Igualmente pregunto, como te definirías?
Moi autoesixente.
- A que xeración pertences: baby-boom, X ou millenial?
A ningunha. Sempre me movín nun abano moi amplo de amigos e coñecidos. Podo estar con xente 20 anos maior ou menor ca min e pásoo estupendamente.
- Cales dirías que son as características da túa xeración?
Pois en moitos aspectos non sabemos por onde nos vén... o que teña que vir. Vivimos moitísimos cambios e non sempre soubemos adaptarnos.
- Como comezaches no sector do turismo?
Pois eu tiña un traballo máis "normal", de oficina, e canseime. Cando xa tiña na cabeza dar un cambio á miña vida, comecei a formarme en audiovisual, creación de contido etc. E fun lanzándome pouco a pouco. Todos os anos digo que é o último que me dedico a isto, pero aí sigo.
- Falas de creación de contido, considéraste un influencer?
Diría que non. É certo que en ocasións o meu traballo pódese aproximar ao que fai un influencer, aos que respecto absolutamente, pero creo que a diferenza está na honestidade. Entre os influencers sempre está presente.
- O que para ti é traballo constitúe para moitos outros o que sería un plan para as súas vacacións, cústache facer entender esa diferenza?
Sempre digo que se viñesen comigo saberían distinguir perfectamente cando unha viaxe é por traballo ou porque decido darme uns días de descanso. Se é traballo, eu vou cun compromiso adquirido xa sexa cunha axencia de comunicación ou cun hotel, por exemplo, para a elaboración de blogs, fotografías, vídeos etc. Se non fose un traballo, ninguén estaría disposto a pagar por el.
- Que é a amizade?
Algo complicado de definir, pero fundamentalmente confianza.
- Se puideses viaxar no tempo, irías ao pasado ou ao futuro?
Non lle teño ningún aprecio ao pasado, así que iría ver Pontevedra dentro de 100 anos.
- Unha parte da túa casa que che apeteza intervir, por que?
Sen dúbida ningunha o xardín, pero non teño tempo.
- Frío ou calor?
Calor.
- Cando dixeches por última vez "quérote"? a quen?
Á miña amiga Laura esta fin de semana polo seu aniversario.
- A quen che gustaría ver nesta sección?
A Paula Vida, propietaria de Nalatcha.
- E por último, que vas facer en canto remate esta entrevista?
Pois irme a outra entrevista de traballo.
Para Alberto, Pontevedra sabe a café, cheira a infancia, é de cor pedra e soa a música tranquila. Definitivamente, Alberto Ribas sente Pontevedra.
O CUESTIONARIO
− Nunca saio da casa sen... móbil.
− Na miña neveira sempre hai... iogures.
− No meu armario destacan... as camisas de cores.
− A idade é... un número.
− Sempre fun o ollo dereito da... miña avoa.
− Pontevedra ten alma de... navegante.
− Creo en... min.
− O ano que marcou a miña vida foi... creo que ningún.
− O mellor agasallo que me poden facer é... unha viaxe.
− O meu lugar no mundo é... Salvador de Bahía.
− Se non puidese vivir en Pontevedra viviría en... Lisboa.
− O meu momento favorito do día é... a tarde.
− Pontevedra... amigos.