A metade das infraccións que detectou a Policía Local de Poio durante esta fin de semana corresponde a un mesmo suceso: unha festa que sete persoas estaban a celebrar nunha vivenda situada na parroquia de San Salvador.
Os axentes, que se trasladaron ata a zona logo de recibir o aviso dun particular, comprobaron que estas persoas non eran conviventes e identificounas a todas.
Estes individuos trataron de esconderse en diferentes puntos do interior do inmoble, pero a Policía Local xa tiña constancia previa da celebración da festa.
Nunha primeira inspección visual desde o exterior xa constataran que dentro había una reunión ilegal, xa que actualmente só se permiten encontros dun máximo de catro persoas,, na que tamén participaban algúns menores de idade.
A estas sete denuncias hai que sumarlle outras tres tramitadas nos controis efectuados nas estradas do municipio, contra condutores que saltaron o peche perimetral. Ademais, tamén se identificou a catro veciños por non utilizar a máscara na vía pública.
Por outra banda, a Policía Local tamén tramitou unha denuncia penal contra un veciño de Poio que se saltou un control situado nas inmediacións da ponte da Barca.
Os axentes lograron darlle o alto nunha rúa próxima a este emprazamento. O condutor deu positivo por consumo de alcol, acadando unha taxa de 0,88, o que practicamente equivale a triplicar o máximo permitido por lei. Será sometido a un xuízo rápido.