A procesión máis feminina da Semana Santa de Pontevedra, que cada Mércores Santo saca á rúa á Santísima Virxe da Soidade e Jesús Nazareno coa Cruz ao lombo, celebrouse este ano coa habitual solemnidade da cita e marcada polo bo tempo e unha nutrida participación.
A cita, organizada pola confraría da nosa Nai da Maior Dor, a única de Pontevedra integrada na súa totalidade por mulleres, partiu ás 21.00 horas da basílica de Santa María.
A procesión, cuxa tradición se remonta ao ano 1949, recuperouse o ano pasado tal e como marcaba a historia e este 2023 repetiu imaxe: as dúas tallas percorreron a cidade escoltadas por mulleres.
Cálelas Amargura, Isabel II, Real, Praza de Curros Enríquez, Manuel Quiroga, Don Filiberto, Alhóndiga e avenida de Santa María presenciaron a súa solemnidade.
Este Xoves Santo, a cita coa Semana Santa será ás 20.00 horas na basílica de Santa María. Sairá a procesión dos Pasos, coas imaxes do paso da Cea, paso da Oración no Horto e o Bico de Judas, paso de Jesús Cautivo e paso da Flagelación, paso do Jesús atado á columna, paso do Ecce-Homo, paso do Santísimo Cristo da Expiración e Virxe da Soidade.
Ás 23.00 horas celebrarase a Hora Santa na Basílica de Santa María e San José.
Xa este Venres Santo, a cita será dobre. Pola mañá, ás 09.30 horas, dará comezo a procesión do Encontro, con saídas simultáneas desde as igrexas de San Bartolomé e Santa María para realizar o encontro na praza de Teucro, con sermón.
Pola tarde, ás 20.00 horas, sairá a procesión do Santo Enterro desde a basílica de Santa María.