O Concello de Soutomaior segue avanzando na mellora da xestión de residuos cunha nova fase na implantación do colector marrón, destinado á recollida de materia orgánica.
Como principal novidade, substituirán os actuais sistemas por novos colectores que funcionarán mediante cartón electrónico para facilitar o seu uso e reducir os custos de mantemento. A implantación destes colectores comezará a finais de xuño en diferentes rúas do municipio.
As persoas usuarias do servizo deberán recoller o seu novo cartón de acceso na carpa da campaña informativa 'Ti tes a chave', que percorrerá distintas localizacións durante as próximas semanas.
Ademais, aquelas familias que aínda non participan na recollida de orgánica poderán solicitar a súa incorporación a través dun formulario habilitado na web.
O alcalde, Manu Lourenzo, subliñou que esta iniciativa pretende "facer máis sinxela a participación da veciñanza na reciclaxe e na correcta separación dos residuos, así como avanzar entre todos cara un concello máis sostible".
Neste sentido, destacou tamén a implicación cidadá para mellorar os datos de reciclaxe no municipio.
A campaña informativa a pé de rúa arrincou este luns na rúa Rosalía de Castro, á altura do monumento á ostra, e continuará o día 15 no mesmo lugar e horario. O Concello anunciará novas datas e localizacións a través das súas canles oficiais.
Así mesmo, quen non poidan acudir poderán recoller o seu cartón no punto verde da Montesiña, de luns a venres en horario de mañá.
De forma paralela, o Concello desenvolverá unha campaña específica dirixida os grandes produtores, como establecementos e negocios, para informar sobre o novo sistema e lembrar a obrigatoriedade de separar os residuos orgánicos.
O colector marrón está destinado a restos como froita, verdura, carne, peixe, pan, pousos de café, restos de poda ou papel de cociña usado, quedando excluídos materiais como plásticos, envases ou produtos de hixiene.