Aínda que o tempo non está a acompañar neste Entroido, o Concello de Soutomaior non se quere dar por vencido e reorganizou as citas que quedan por diante.
O Enterro da Sardiña, orixinalmente programado para o mércores de cinza, trasládase ao venres 20 de febreiro debido á choiva prevista para a primeira data.
O velorio comezará ás 19:30 horas e o cortexo fúnebre sairá ás 20:00 horas desde a Praza Cima de Vila. Pasará pola rúa Xosé Solla até finalizar en Cagazó, no campo da petanca, onde se dirá adeus á sardiña.
A previsión meteorolóxica tamén obrigou a modificar a animación rueira nos comercios, que se desenvolveu este martes enchendo de alegría, humor e espírito carnavalero as rúas de Soutomaior e Arcade.
Nesta xornada, o xurado visitou os comercios e hostalaría participantes no concurso 'VAIA MECO!', que premia os mellores versos e personaxes do Entruido.
Este domingo 22 de febreiro, ás 17:30 horas, arrincará desde o cruzamento de O Viso o desfile de comparsas, adaptado polas obras de humanización na Praza de Talo Río de Arcade e con final na rúa Roxelio Landeiro.
O primeiro tramo, até o cruzamento de Cima de Vila, será "silencioso" para que todas as persoas poidan gozar da cita en igualdade de condicións.
O desfile estará encabezado por Juan de Arcade, pregoeiro habitual, que lerá o pregón ás 20:00 horas. Posteriormente entregarán os premios e continuará a festa coa actuación do Trío Armonía.
Participan a Asociación Cultural Miúdos (Soutomaior), a Asociación Cultural Moreira a Tope (Soutomaior) e a Asociación Andaina de Persoas con diversidade funcional de Redondela, o tres convidadas, e as comparsas seleccionadas para desfilar.
Estas son a Asociación Sociodeportiva Cultural Os da Caña (Marín), Asociación Os da Casa (Vigo), Asociación Recreativa e Cultural de Guizán (Mos), Asociación Carnavalera Os Campechanos (Ponteareas), Asociación Cultural de Pontellas (Porriño) ou Asociación Os Festeiros de Bembrive (Vigo).
A elas sumaranse a Asociación Cultural Luces (Tomiño), Asociación Cultural Trompos Os Pes (Marín), Asociación A Pandilla (Ponte Caldelas), Asociación Recreativa e Cultural Barca de Loimil (Arbo) e a Asociación Agrupación Culural Comisión de Festas de Cepeda (Pazos de Borbén).
Engade Pontevedra Viva como fonte preferida de Google de balde
Mantente informado coas últimas noticias de actualidade.