O Concello de Marín anunciou este martes a suspensión da tradicional tirada de fogos das Festas de Loira prevista para esta fin de semana debido á "desoladora situación" que se está a vivir en Galicia cos incendios forestais.
A decisión foi tomada pola proximidade do evento aos montes Sobareiro e A Cova, o que supón "un gran risco" nas actuais circunstancias.
Tradicionalmente os fogos artificiais nesta festa son lanzados desde o areal de Loira.
O resto da programación das festas mantense intacta grazas á colaboración dos locais de hostalaría da zona.
As celebracións de Loira van desenvolverse este sábado 23 de agosto ás 12:00 horas cunha sesión vermut amenizada pola charanga Os Jalácticos.
A programación continuará ás 17:00 horas cunha festa da escuma na praia, seguida da actuación do DJ Pedrito a partir das 20:00 horas como preludio ao concerto de Jorge Álvares, que subirá ao escenario ás 00:30 horas.
Desde o Concello transmitiron o seu "máis absoluto apoio a todas as persoas e poboacións que se están a ver afectadas por esta traxedia" dos incendios, así como aos efectivos que realizan "un incansable labor de extinción" dos lumes que asolan a comunidade.
O goberno da alcaldesa María Ramallo aproveita para facer un chamamento especial á prevención, instando á poboación a seguir as recomendacións de Medio Rural.
Entre as medidas preventivas destacan non facer queimas, evitar tirar cabichas ao chan, non usar maquinaria que poida lanzar faíscas e chamar ao 085 en caso de detectar un incendio.
O Concello remite aos veciños ao apartado do IRDI (Índice de risco diario de incendio forestal) da web de Medio Rural para consultar as prohibicións existentes neste período de alto risco, así como as recomendacións específicas segundo o nivel establecido.