Decenas de persoas están a achegarse ao longo deste venres 19 polas instalacións da Casa da Luz, na praza da Verdura de Pontevedra, para participar no casting que Bambú Producciones está a levar a cabo para seleccionar figurantes para a serie televisiva sobre o narcotráfico galego, 'Fariña', que se rodará este verán nas Rías Baixas.
As probas comezaban ás 9.30 en sesión matinal e continúan pola tarde ata as 19.30 horas. A produtora busca todo tipo de perfís, sempre que se trate de persoas maiores de 16 anos, para participar nos capítulos dunha serie que será emitida por Antena 3 e que contará nos seus principais papeis cos actores galegos Javier Rey e Marta Larralde, ademais de Tristán Ulloa.
A proposta para a pequena pantalla buscará realismo, baseándose no libro 'Fariña' de Nacho Carretero, e nela aparecerán capos galegos tan coñecidos como Sito Miñanco, Marcial Dorado ou Laureano Oubiña.
A rodaxe terá como centro de operacións o concello de Noia, pero gravarase en diversos escenarios como Vilanova de Arousa, Vilagarcía, O Grove, Cambados e Pontevedra, a partir do mes de xuño.