Sanxenxo acollerá no mes de setembro un dos desafíos culinarios máis emblemáticos de Galicia: cociñar a tortilla máis grande do mundo.
O Concello, xunto á empresa familiar galega El Huevo de la Abuela, pecharon un acordo de colaboración para celebrar o sábado 5 de setembro esta cita, que buscará bater unha nova marca tras o éxito das dúas primeiras edicións.
O evento coincidirá coa Feira da Cebola e a festividade de Santa Rosalía.
Aínda que as cifras definitivas estean por pechar, a organización avanza que farán falta máis de 17.000 ovos, 2.000 quilos de patacas, 300 litros de aceite e 30 quilos de sal para elaborar unha tortilla que se espera que alcance o seis metros de diámetro e arredor de 10.000 quilos de peso.
Para elaborala participarán unhas 70 persoas e para volteala necesitarán un guindastre de 75 toneladas.
Manuel Casal, propietario de El Huevo de la Abuela, asegurou que "este ano haberá novidades" co obxectivo de superar os rexistros das dúas edicións anteriores.
Así mesmo, agradeceu "o interese do Concello de Sanxenxo para acoller este reto" e animou á hostalaría local a sumarse á celebración.
Casal adiantou que a tortilla se preparará "con dúas voltas" e que a metade será sen cebola e a outra con cebola, "como non podía ser doutra forma celebrándose a Feira da Cebola".
O evento terá fins solidarios e o diñeiro recadado coas racións destinarase a comedores sociais e entidades benéficas.
Engade Pontevedra Viva como fonte preferida de Google de balde
Mantente informado coas últimas noticias de actualidade.