Novo paso no desexo municipal por liberar os terreos da Xunqueira de Alba. A Dirección Xeral de Tráfico (DXT) comunicou por escrito ao Concello que acepta trasladar o seu centro de exames ao polígono industrial do Campiño.
Nun oficio remitido ao goberno municipal, os responsables da DXT afirman que "non hai inconveniente" para cambiar de sitio estas instalacións e aceptan, iso si con condicións, os terreos propostos polo Concello.
"É unha boa noticia", sinalou o edil responsable da área de infraestruturas, César Mosquera, que explicou que as dúas parcelas que o Concello cederá a Tráfico suman un total de 8.019 metros cadrados, suficiente para cubrir as necesidades da DXT.
Mosquera explicou que haberá que "mirar" a fórmula xurídica máis axeitada para a cesión destes terreos, que obrigará a realizar unha serie de tramitacións administrativas.
Así, entre outras cuestións, o Concello terá que reconfigurar as dúas parcelas que ofreceu ao organismo estatal, dividindo en dúas unha delas e creando un solar único con eses 8.019 metros cadrados, na Rúa Monte Louredo, preto da base aérea do polígono.
Ademais, Tráfico acepta asumir o custo do traslado e da construción do seu novo centro de exames, pero non o investimento necesario para demoler as súas instalacións na Xunqueira de Alba e para renaturalizar todo este espazo.
Estes 6.875 metros cadrados quedarían en mans do Concello, que ten a intención de executar unha actuación similar á realizada pola Deputación de Pontevedra tras a retirada do seu parque de maquinaria e da imprenta provincial.
"O importante é que desde a DXT ven con bos ollos esta mudanza", sinalou o concelleiro nacionalista, que lembrou que a negociación con Tráfico para liberar os terreos que ocupa actualmente comezou no ano 2023.
Para César Mosquera é un "avance significativo" na recuperación de todo este espazo natural. "O noso horizonte está aí e é ver toda a xunqueira libre destas concesións", sostivo, quedando tan só o visto bo da Xunta para algún dos seus equipamentos.