A Policía Local localizou este luns a tres persoas por furtar varias pezas no mercadillo de Baltar.
Segundo informa o Concello de Sanxenxo, trátase de dúas mulleres, de 76 e 71 anos, e un home de 74, que son de Cáceres e Badaxoz.
O arresto enmárcase dentro das campañas habituais de control de seguridade en mercadillos.
Unha persoa que estaba a comprar foi quen avisou á policía.
Ao pedir ao home que acompañaba ás dúas mulleres que abrise o carro, os axentes acharon dentro unha camiseta, un pantalón de liño, dous vaqueiros e unha cazadora.
Non puideron explicar a orixe desas pezas e recoñeceron que as subtraeron de postos do recinto.
A mercadoría quedou retida á espera de ser reclamadas polos seus lexítimos donos, e tramitaranse as dilixencias correspondentes ao xulgado de garda.
A Policía Local, en coordinación coa Garda Civil, participa habitualmente nestes dispositivos para controlar furtos en zonas con gran afluencia, onde a colaboración cidadá é clave.