A evolución da pandemia da covid-19 na área sanitaria de Pontevedra e O Salnés é este mércores moi similar á confirmada o martes. Nas últimas 24 horas volveu a aumentar a ocupación dos hospitais -tres novos pacientes- e os novos positivos detectados superan a vintena -23 en concreto-.
Segundo o último balance oficial realizado polo Servizo Galego de Saúde, este mércores hai 23 pacientes nos hospitais da área sanitaria, tres máis que o martes. Non hai cambios na unidade de coidados críticos do Hospital Montecelo, que ten un paciente como o día anterior, pero si nas plantas de hospitalización, con tres enfermos máis.
Dos 22 pacientes con covid-19 ingresados en planta de hospitalización, a maioría están no Complexo Hospitalario Universitario de Pontevedra. Son, en total, 17. Ademais, hai 1 no Hospital QuirónSalud Miguel Domínguez de Pontevedra e 4 no Hospital do Salnés, dous máis que un día antes.
Así mesmo, outros 243 pacientes con covid-19 evolucionan nos seus domicilios, de modo que o total de casos activos sitúase en 266, 15 máis que o martes. En total, houbo 23 novos positivos detectados nunha xornada na que se realizaron 342 probas PCR.
Desde o inicio do plan de continxencia da covid-19 curáronse na área sanitaria 12.478 pacientes, 8 na última xornada; faleceron 167 e realizáronse ata o momento 186.821 probas PCR.
EVOLUCIÓN EN GALICIA
A nivel autonómico, segundo o balance oficial, hai este mércores en toda Galicia 2.233 casos activos, 21 máis que o martes, tras confirmarse 181 novos positivos na última xornada.
Fronte ao aumento da presión asistencial rexistrado na área de Pontevedra e O Salnés, as cifras autonómicas son máis positivas e hai 27 pacientes en UCI, seis menos; e 161 en planta de hospitalización, 15 menos. En total, hai 21 pacientes menos nos hospitais galegos.
Na área sanitaria da Coruña, os casos baixaron de 685 a 649, 36 menos; en Vigo hai 623, 25 máis; en Santiago de Compostela soben 17, ata 320; en Lugo hai 145 (+6); en Ourense, 139 casos (2 menos); e en Ferrol tamén descenden tres, de 94 a 91.