O turismo estranxeiro segue a medrar na provincia de Pontevedra, cun 7% máis de visitantes internacionais en xuño deste ano fronte ao pasado.
Segundo a información facilitada pola Deputación de Pontevedra, os visitantes internacionais supuxeron en xuño deste ano o 40% das persoas que visitan a provincia de Pontevedra.
Ao longo do mes de xuño, tamén se detectou un crecemento no que respecta á ocupación hoteleira fronte a xuño do pasado ano, superando o 46% de media no conxunto da provincia.
Segundo os datos que manexa o Observatorio de Turismo Rías Baixas que proveñen do Instituto Nacional de Estatística, a chegada de visitantes sitúase por riba desa porcentaxe as cidades de Pontevedra, cunha ocupación do 56%, Vigo, cunha ocupación do 47%, ou O Grove, cunha ocupación tamén do 47%.
Esta tendencia confírmase no que vai de mes de xullo. A oficina de turismo do Palacete das Mendoza, sede de Turismo Rías Baixas, recibiu un total de 2.200 visitantes.
Deles, o 77% son españoles e proceden de Madrid, Barcelona e Zaragoza e o 23% restante do estranxeiro, principalmente de Francia, Reino Unido e Portugal.
Ademais, neste mes de xullo, visitaron os Castelos de Soutomaior e Sobroso máis de 4.000 persoas: 3.056 Soutomaior e preto de 1.000 Sobroso.
Tamén o Camiño de Santiago confirma unha boa saúde. O mes pasado pasaron pola provincia 105.800 peregrinos.
A vía máis transitada é o Camiño Portugués, con 52.300 peregrinos, seguido polo Camiño Portugués pola Costa, con 46.100 persoas.
A Vía da Prata foi elixida por 5.351 peregrinos e o Camiño de Inverno por 1.642.
O 72% dos peregrinos son internacionais e proceden maioritariamente de Portugal, Estados Unidos, Alemaña e Italia.
O presidente da Deputación Provincial, Luis López, destaca que un dos "grandes obxectivos" da estratexia de turismo da institución é a internacionalización e este ano constátase un "forte e continuo crecemento, mes a mes", en canto aos visitantes estranxeiros, que "revalida que as accións impulsadas neste ámbito están a dar os seus resultados".