CC.OO. e UXT protagonizaron unha manifestación conxunta con motivo do Primeiro de Maio, que partiu da praza da Ferrería para finalizar ante a Subdelegación do Goberno.
Na marcha convocada por estes dous sindicatos atopábanse traballadores de entidades que están a sufrir durante estes días conflitos laborais de distinto tipo.
Desta forma, atopábase un grupo de empregados do Parque de Maquinaria da Deputación cunha pancarta na que culpan á presidenta Carmela Silva e ao vicepresidente César Mosquera de querer privatizar o servizo. Tamén na marcha, varios traballadores de Tragsa portaban unha pancarta denunciando o ERE e tamén representantes do comité de empresa de Elnosa levaban unha pancarta rexeitando o peche da factoría en Lourizán. Outro grupo de traballadores de Ence reclamaba a defensa do emprego industrial na comarca.
Ramón Vidal, secretario comarcal de UXT, reclamou no seu discurso a creación dun tecido empresarial en Pontevedra para evitar a actual precariedade laboral. Vidal apunta que un elevado número de fogares do municipio sofren dificultades para chegar a fin de mes, segundo os datos da EPA. E sinalou que Pontevedra non pode continuar dependendo do sector servizos e da hostalería, que é un sector que se sostén con contratos temporais.
Ademais, os dous sindicatos reclaman a derrogación da última reforma laboral impulsada polo Partido Popular.
Pola súa banda, José Luis García Pedrosa, secretario comarcal de Comisións Obreiras, referiuse á diminución de traballadores nos actos do Primeiro de Maio durante os últimos anos. Unha situación que relaciona coa posibilidade de que se cre un novo goberno pero advertiu da necesidade de que a clase traballadora salga á rúa para marcar a liña do que deben facer os gobernantes no aspecto económico e laboral.