O Centro Asociado da UNED en Pontevedra pon en marcha a novena edición do curso de Extensión Universitaria "Xestión de Proxectos de Cooperación Internacional", unha proposta formativa online que se celebrará do 27 de setembro ao 20 de decembro de 2025, con 40 horas lectivas e a posibilidade de obter 2 créditos ECTS.
Dirixido por Ana María Rodríguez González, docente cunha sólida traxectoria académica e profesional, e coa participación do experto Daniel Vigo Blanco, o curso está deseñado para ofrecer unha visión integral da cooperación ao desenvolvemento.
O seu obxectivo é o de formar a persoas capaces de deseñar, xestionar e avaliar proxectos en ONGD, asociacións, fundacións, cooperativas e empresas sociais.
A través dun enfoque teórico-práctico, o alumnado aprenderá a desenvolverse no complexo mundo da cooperación internacional, comprendendo os seus marcos institucionais, financeiros e metodolóxicos.
Ademais, abordaranse aspectos crave como os Obxectivos de Desenvolvemento Sostible, a Axenda 2030, o Enfoque do Marco Lóxico, a Responsabilidade Social Corporativa, e as distintas formas de financiamento de proxectos.
Segundo Rafael Cotelo Pazos, coordinador do curso e responsable de Extensión Universitaria e Actividades Culturais na UNED de Pontevedra, esta formación é moito máis que un curso, é unha "experiencia transformadora que contribúe a cambiar vidas".
O alumnado sairá capacitado non só para traballar no sector, senón para crear a súa propia entidade social ou proxecto de cooperación.
O traballo da UNED Pontevedra proxectouse en África e América Latina, mediante accións de acompañamento a emprendedores sociais e o impulso de proxectos que xeraron un impacto directo en comunidades en situación de vulnerabilidade.
"É un bo acompañamento aos emprendedores; colabórase con eles para levar a bo termo as súas ideas e os seus proxectos cos que se axuda dunha maneira directa a moita xente en países do terceiro mundo ou que están en situación de emerxencia social desesperada", explica Cotelo Pazos.
O curso vai dirixido a calquera persoa con inquedanzas sociais e ganas de aprender: estudantes universitarios, profesionais do terceiro sector, cooperantes, activistas ou simplemente persoas interesadas no mundo da cooperación.
Engade Pontevedra Viva como fonte preferida de Google de balde
Mantente informado coas últimas noticias de actualidade.