O centro de Pontevedra da Universidade Nacional de Educación a Distancia organiza unha conferencia que terá lugar este xoves 12 de febreiro ás 17:00.
A actividade forma parte do seu programa de Extensión Universitaria e será de modalidade híbrida: poderase asistir presencialmente na sede da UNED en Monte Porreiro ou seguila online, tanto en directo como en diferido.
Baixo o título "Estafas amorosas", esta charla forma parte da programación cultural e divulgativa da institución e estará coordinada polo responsable de Extensión Universitaria e Actividades Culturais do centro, Rafael Cotelo Pazos.
A sesión impartirala Javier Mingorance, pedagogo colexiado e mediador inscrito no Rexistro de Mediadores do Ministerio de Xustiza, quen profundará no fenómeno das chamadas romance scams, estafas que se están propagando cada vez máis a través das redes sociais.
Durante a charla analizaranse as pautas psicolóxicas e as estratexias que utilizan os estafadores para enganar ás súas vítimas.
A finalidade da conferencia é proporcionar ferramentas para detectar fraudes, identificar os sinais de alerta e recoñecer as mensaxes habituais dos estafadores. Tamén se explicarán as principais formas de prevención e actuación ante este tipo de enganos.
Así mesmo, abordarase o efecto psicolóxico e sociolóxico que estas estafas xeran e a importancia de denuncialas.
A actividade diríxese ao público xeral, sen necesidade de coñecementos previos, especialmente a usuarios habituais de contornas e plataformas dixitais.
A conferencia finalizará ao redor das 20:00.