A UNED xa está preparada para acoller unha "edición histórica" dos seus cursos de verán, que con 19 propostas formativas consolídase como un dos referentes nacionais desta iniciativa académica. O centro espera superar a marca de 1.100 alumnos matriculados do pasado ano.
A presentación oficial celebrouse lugar este xoves no centro de Monte Porreiro e contou coa participación de Víctor M. González, director do Centro Asociado de Pontevedra e do Campus Noroeste da UNED; Demetrio Gómez, concelleiro de Educación e Universidades do Concello de Pontevedra; Rafa Domínguez, vicepresidente da Deputación Provincial de Pontevedra; e Jesús de Andrés, vicerreitor de Centros Asociados da UNED.
No acto, González Sánchez destacou o crecemento da programación deste ano na provincia, tanto polo número de cursos como pola súa implantación territorial e a diversidade temática das propostas, que chegarán este ano a Pontevedra, Vigo, Tui, Lalín, O Porriño, Ponteareas, Portas e o Centro Penal da Lama.
Subliñou que esta edición representa "a oferta máis ambiciosa desenvolvida até agora pola UNED Pontevedra", destacando ademais "a capacidade da universidade para achegar coñecemento de calidade a toda a provincia a través dunha programación conectada cos grandes debates sociais, educativos e tecnolóxicos actuais".
O director do centro incidiu tamén no papel da UNED como institución vertebradora do territorio e referente de formación pública e accesible e sinalou que "o ano pasado fomos o top 3 de España en canto a número de cursos e de alumnos e este ano somos o Top 2".
Pola súa banda, Demetrio Gómez destacou a importancia da colaboración entre administracións para impulsar iniciativas que "convirten a Pontevedra nunha cidade universitaria aberta ao pensamento crítico, á cultura e á innovación".
O concelleiro de Educación e Universidades valorou a capacidade da UNED para estender a actividade académica máis aló das aulas e achegala a toda a cidadanía e sinalou que "nunha cidade tan pequena como Pontevedra somos capaces, colectivamente, de sacar adiante un proxecto tan complexo como este".
No caso de Rafa Domínguez, puxo en valor a importancia de que as actividades cheguen a diferentes municipios e colectivos da provincia, así como o reforzo que isto supoñen para a proxección de Pontevedra como "territorio comprometido co coñecemento, a formación continua e a excelencia educativa".
Na mesma liña, Jesús de Andrés resaltou o modelo da UNED como unha universidade "moderna, flexible e plenamente integrada nas necesidades da sociedade actual", subliñando que a programación de verán constitúe "unha das grandes ferramentas de transferencia de coñecemento e divulgación universitaria da institución".
"Este ano impartiemos 172 cursos, en 33 centros e 60 localidades e dentro da UNED España sempre destaca Pontevedra grazas á calidade profesional e humana do seu equipo. Pontevedra é a segunda en número de alumnos matriculados, despois de Madrid, ofrecendo unha formación máis estival, máis relaxada pero non por iso menos rigorosa", asegurou o vicerreitor de Centros da UNED.
A programación deste ano abordará cuestións de actualidade social, política, tecnolóxica, educativa e cultural, con cursos centrados en intelixencia artificial, xeopolítica, saúde mental, educación, igualdade, comunicación, dereito, arte ou cambio climático.
A matrícula para os cursos de verán permanecerá aberta durante as próximas semanas a través da plataforma oficial da UNED.