A Policía Nacional de Pontevedra detivo nos últimos días a un home que creou unha ferramenta usando unha bolsa e un móbil e empregouno para gravar a mulleres sen o seu consentimento.
Segundo a información facilitada pola Policía Nacional, atribúeselle un delito contra a intimidade tras obter imaxes de mulleres de forma ilícita.
Axentes de paisano da Policía Nacional detectaron o home mentres actuaba na zona comercial da cidade, tanto dentro como fóra dos negocios.
Os axentes adscritos ao grupo de prevención da delincuencia realizaban labores de vixilancia con motivo do dispositivo de rebaixas cando detectaron este home en actitude sospeitosa.
Así, observaron que permanecía en actitude vixiante e, cada vez que pasaba polo seu lado unha muller con saia curta, colocábase tras ela e seguíaa durante uns metros.
O home ía moi pegado e achegaba a bolsa que levaba na man á altura das nádegas da muller.
Tras observar que repetía esta forma de actuar varias veces, os policías iniciaron unha vixilancia discreta, comprobando que entraba e saía de tendas utilizando o mesmo procedemento.
Os policías tamén detectaron que se dirixía a un vehículo que estaba aparcado na zona e púñase algunha peza diferente para tratar de pasar desapercibido.
Durante a vixilancia, cando saía dunha das tendas tras unha muller, observaron como manipulaba o seu teléfono móbil e colocábao na bolsa.
Nese momento, déronlle o alto e viron que tiña a bolsa habilitada para poder gravar as mulleres por baixo da saia.
Os axentes identificárono, detivérono e intervinieron a bolsa preparada, onde aínda levaba o teléfono móbil gravando.
