A Comisión de Urbanismo do Concello de Pontevedra volveu pór o foco nas vivendas de uso turístico durante a súa última reunión. Segundo explicou este martes o concelleiro de Urbanismo, Alberto Oubiña, o Concello acaba de dar luz verde a dous trámites relacionados con este tipo de aloxamentos, unha materia que o goberno local mantén baixo estreita vixilancia desde a modificación do Peprica aprobada en 2024.
Por unha banda, concedeuse unha licenza urbanística para rehabilitar, ampliar e acondicionar un edificio situado en Michelena, 36, onde unha única entidade promotora prevé abrir un local comercial e sete apartamentos turísticos.
Por outro, Urbanismo respondeu de forma favorable a unha consulta sobre a explotación de vivendas de uso turístico nun inmoble da Praza da Verdura, 14, un edificio con varios propietarios. Neste caso, a normativa é estrita e sinala que o inmoble completo debe destinarse a uso turístico, polo que Oubiña advertiu que si un só dos pisos abandonase esta actividade, desaparecería automaticamente a autorización para todos.
Estes casos analízanse xa baixo o paraugas da modificación do Peprica, aprobada en setembro de 2024, que limita a apertura de aloxamentos turísticos no Centro Histórico co obxectivo de garantir "unha correcta convivencia entre residentes e visitantes".
A nova normativa só permite conceder licenzas para uso turístico en edificios completos, baixos ou primeiros pisos. Aínda que estes criterios xa se aplicaban no resto da cidade, no centro histórico existía até agora unha maior flexibilidade para impulsar a rehabilitación de vivendas.
TAFISA SUMA UN NOVO PROXECTO RESIDENCIAL
O concelleiro tamén informou sobre outros avances urbanísticos, como a concesión dunha nova licenza nos terreos da antiga Tafisa, onde a cooperativa Beiras do Lérez levantará un edificio residencial. Este desenvolvemento forma parte da transformación progresiva da zona, un dos grandes ámbitos de crecemento urbano de Pontevedra.
Oubiña aproveitou para repasar a actividade urbanística do último ano. En 2024 autorizáronse licenzas para a construción de seis edificios que suman 243 vivendas, ademais de 15 unifamiliares, o que eleva o total a 258 novas vivendas. Tamén se concederon varias licenzas de primeira ocupación, en concreto foron sete bloques con 266 fogares e outras 13 vivendas unifamiliares.
As previsións para 2025 apuntan a cifras similares ou mesmo lixeiramente superiores. "A construción avanza a bo ritmo, pero sen ser desbocado, senón sostido no tempo", subliñou o edil.
Engade Pontevedra Viva como fonte preferida de Google de balde
Mantente informado coas últimas noticias de actualidade.