A asociación pontevedresa Vaipolorío dá por finalizada a súa actividade de retirada de lixo do leito do río Gafos durante este verán coa última xornada que se desenvolvía durante a mañá deste último domingo de agosto de 2020 polo sendeiro rural.
Máis de vinte persoas voluntarias participaron nesta última sesión na que se retiraban ao redor de 80 quilos de residuos depositados no río e nas ribeiras. Nesta ocasión contaron coa colaboración de integrantes da Fundación Juan XXIII.
Unha vez máis se notaba a ausencia dun maior número de xente nova que asuma as rendas desta actividade ecoloxista e de coidado medio ambiental. A campaña iniciárase o 2 de agosto na que participaron 17 voluntarios que lograron sacar do río ao redor de 240 quilos de lixo. A actividade mantívose durante os catro domingos seguintes.
Vaipolorío tamén celebraba durante a noite deste 29 de agosto a noite europea dos morcegos cunha charla na contorna do río e a observación das especies que habitan neste espazo natural de Pontevedra. A sesión estivo dirixida pola asociación luguesa Drosera, que desenvolve proxectos de conservación e valorización de hábitats e especies que se atopan ameazadas en Galicia.